Te Kohinga Taonga Māori

	English language version of this page is also available.

He nui tonu ngā taonga puritia ai i Ngā Taonga Whitiāhua he āhuatanga Māori kei roto. E mōhiotia ana ēnei ko te kohinga taonga Māori, ahu mai ai ēnei whakaahua o ngā iwi maha puta noa te whenua, ā, he whānui ngā momo pikitia, he tini anō hoki ngā kaupapa.

Kei roto i te kohinga ngā whakaahua ā whatu, ā taringa hoki, he karanga, he whaikōrero, he kōrero tuku iho ā iwi, ā hapū, he pōwhiri, he wharenui, he marae, he kapa haka, ngā āhuatanga o te rā o Waitangi (mai i te tau 1934), he whakaaturanga whatu kākahu, he tukutuku, he whakairo, me ētahi atu taonga maha noa iho.

I tīmata Ngā Taonga Māori i ngā tau 1980, i te hokonga o ngā taonga o James McDonald mō Te Whare Pupuri Taonga o Aotearoa. I ngā tau 1920 i haere a James MacDonald, i te taha o Te Rangihīroa (Tā Pita Buck) rāua ko Apirana Ngata, i ana haere ki Tūranga-nui-ā -Kiwa me Te Tai Rāwhiti, ki Rotorua, ki Ruatāhuna me te awa o Whanganui. Nā ngā mahi whakaahua tāngata i riro mai ai ngā whakaahua maha o ngā tāngata, o ngā hapū, o ngā iwi, me tētahi āhuatanga noho kua ngaro noa atu i te tirohanga kanohi.

He tino mea uaua te whakarauora i ēnei taonga. I tua atu i te whakaora i te kiko o ngā rīpene, he mea nui kia tirohia ngā whakaahua, ngā wā me ngā wāhi i tangohia. He nui ngā kupu whakamārama whai take i ngā tuhinga a Makitānara me ōna hoa, a Elsdon Best rāua ko Johannes Anderson. Waihoki te kōrero tahi ki ngā iwi, he mea nui kia tika tā mātou tuhi kōrero, whakaahua hoki i ō rātou tūpuna.

Nā ngā kōrerotanga ki ngā iwi i tino mōhio ai Ngā Kaitiaki ki ngā whakaaro aroha o te iwi Māori ki ngā pikitia nei, me ngā whakaahua o ō rātou tūpuna.

Kei te kohikohi haere tonu ngā Kaitiaki i ētahi atu taonga hōhonu, e ai ki te whakaaro Māori. I te pikinga ake o te maha o ngā taonga o te kohinga, kei te piki haere hoki te hiahia o Ngā Kaitiaki ki te atawhai i ngā taonga i runga i te tika, i te pono.

Ko te mahi ia o tēnei wā, mehemea he nui tonu ngā āhuatanga Māori o roto i tētahi taonga, ka haere tika atu ki raro i Ngā Taonga Māori. Mā te iwi rawa e kī, kātahi anō ka rerekē.